平鎮北勢徐屋長樂客

【文、圖∕徐貴榮∕國立中央大學客家語文暨社會科學學系兼任助理教授】

 

　　徐姓人口在平鎮座第10大姓，比桃園全市第11較前一名，比全國第20超前一倍，表示徐姓在平鎮个重要地位同集中性。前幾期仔有紹介過南勢南華街徐屋「翹峨翹棟」、南天橋「五代中醫」同「生徐死吳」兩隻徐屋、山仔頂徐屋「大埔客」，本期來紹介北勢「長樂客」。

　　本位个徐屋係15世徐聰秀，大約在清朝嘉慶年間，從廣東省長樂縣（今五華縣）來台，到北勢庄開基，就係這下个新英里中豐路「非常大地」落去西片析个樹林巷仔肚。徐屋來開墾該兩時，係算慢來个，高不將先贌田耕種。聰秀降兩個倈仔明榮、明富。老弟「明富」當會做生理，故所當遽就賺當多錢，過加「兄弟合作土變金，子嫂和挼家業興」，子弟又煞猛，無幾久个時間，田地買到天闊地闊，租分當多人耕，從北勢到宋屋都有徐屋个田地，做得講係「富甲一方」。頭擺該搭仔安到「徐屋」，新竹客運个站牌名仔也安到「徐屋」，可見當年徐屋的顯赫。

　　「明富」過身出山个時節，場面非常个鬧熱，當多人來拈香。因爭來个人忒多，伙房肚个天時坪無法度容納恁多人，就在圍牆外設堵仔堵起來，毋分一般人落去，又為着分來拈香个人食點心，就在外背放「毛籣」，同「粢粑仔」擲到外背个毛籣項分人客食，結果外背个人當多，人相賽傾下去拈粢粑仔食，一無細義嗄擲着人个背囊，結果被人傳誦「徐阿富發狂，粢粑擲背囊」，顯示當時徐屋个家聲同奢華。

圖1 當年徐屋享受个「解慍軒」這下樣貌（2011.1.10攝）

　　該兩時，徐屋有錢吔！享受跈等來，為着娛樂，起个右橫屋安到「解慍軒」（圖1），主要係暗晡時想愛娛樂个時節，喊兜細妹仔來唱歌跳舞，快樂人生。歌舞昇平，錢銀好使，花天酒地。因為生活奢華過頭，轉圜毋過，緊賣田產，包尾傳到日本時代18世个時節，同屋仔、田地總下賣分王姓人，子孫各散西東，搬个搬、走个走，屋仔「東海堂」變到「植槐堂」。（圖2）

圖2 徐姓「東海堂」變到王姓「植槐堂」，目前左橫屋塌忒。
右橫屋就係「解慍軒」（2011.1.10攝）

　　這下徐屋係阿哥「明榮」傳下个。明榮耕田為生，到17世歷昌公看到叔伯兄弟子姪這兜使錢恁大概，房產陸陸續續變賣，就帶等子女搬到這下个住所（新富街）起屋，耕自家分着个田。這兜田當多係湳仔，辛苦耕種正發達起來。當時起个屋慢慢仔變到伙房屋，到這下大約有90零年吔！毋過在十過年前拆忒，同建設公司合建起樓來賣，徐屋後代還異多人在這社區內。（圖3） （本文感謝徐名崧老先生口述，參看徐氏族譜、祖宗牌位整理完成。）

圖3 19世徐名崧（圖左，昭和6年，1931年出生）與筆者合影
（2013.09.15攝）

　　
徐貴榮教授 聲檔 — 平鎮北勢徐屋長樂客（四縣腔）





　

▲BACK